काठमाडौं । संयुक्त अरब इमिरेट्स (युएई) ले कोरोना विरुद्धको खोप लगाएका नेपालीलाई प्रवेश खुला गरेको छ । युएईले आज बिहीबारदेखि लागू हुने गरी प्रवेश खुला गरेको आबुधावीस्थित नेपाली दूतावासले जनाएको छ । त्यस्तै, युएईको भिसा भएका तर खोप नलगाएका व्यक्तिलाई ४८ घन्टाभित्रको पिसिआर नेगेटिभ रिपोर्ट अनिवार्य गरिएको छ ।
युएईको सरकारी निकायमा कार्यरत व्यक्ति, युएईमा कार्यरत स्वास्थ्यकर्मी, युएईका विद्यालय तथा विश्वविद्यालयका शिक्षक, युएईमा उपचार चलिरहेका व्यक्ति, विशेष मानवीय परिस्थिति भएका व्यक्तिले प्रवेश पाउनेछन् ।
उनीहरूले युएई सरकारको अनुमति भने लिनुपर्नेछ । त्यसरी युएई प्रवेश गर्नेका व्यक्तिको हकमा नेपालको विमानस्थलमा र्यापिड टेस्ट हुने, युएईका विमानस्थलमा अवतरण भएपछि पिसिआर परीक्षण हुने, क्वारेन्टिन लगायतका अन्य स्वास्थ्य प्रोटोकलको पालना गर्नुपर्ने दूतावासले जनाएको छ ।
युएई सरकारले प्रवेशमा प्रतिबन्ध लगाएपछि बिदामा आएका सयौं आप्रवासी कामदार फर्किन पाएका छैनन् । नेपालीमाथि लागेको यात्र प्रतिबन्ध कै कारण फ्लाई दुबई, इमिरेट्स, इतिहाद जस्ता वायुसेवा कम्पनीले नेपालमा उडान सञ्चालन नगर्दा दुबई र अबुधाबीलाई ट्रान्जिट बनाएर युरोप, अमेरिका, अस्ट्रेलिया लगायत मुलुक जाने नेपाली त्यो अवसरबाट वञ्चित छन् ।
