साताको दोस्रो कारोबार दिन आज (सोमबार) पनि सेयर बजारमा सकारात्मक माहोले निरन्तरता पाएको छ । आईतबार उच्च अंकले बढेको नप्सेमा आज पनि दोहोरो अंकको बृद्धि भएको छ भने कारोबार रकममा पनि केहि बृद्धि देखिएको छ । पछिल्लो समय औषतमा ४ अर्ब रूपैयाँ बराबरको कारोबार भइरहेकोमा आज पनि ७ अर्बमाथिको कारोबार छ ।
नेपाल स्टक एक्सचेञ्जका अनुसार आज (सोमबार) सेयर कारोबार मापक नेप्से परिसूचक १९.४३ अंकले बढेर २७८४.९५ विन्दुमा पुगेको छ । नेप्से ०.७० प्रतिशतले बढेको हो । सेन्सेटिभ परिसूचक पनि ३.१६ अंकले बढेर ५२२.५३ विन्दुमा पुगेको छ ।
कूल २३६ वटा कम्पनीको एक करोड ४२ लाख ८८ हजार १ सय ३० कित्ता सेयर खरिदबिक्री हुँदा ७ अर्ब १२ करोड ३४ लाख २४ हजार ३५ रूपैयाँ १३ पैसा बराबरको कारोबार भएको नेप्सेले जनाएको छ ।
स्टकका अनुसार कारोबार भएका कूल १३ उपसमूहमध्ये ३ उपसमूहको मात्र उपसूचक घटेको छ घने बाँकि सबै समूहको उपसूचक बढेको छ ।
सोमबार गोर्खाज् फाइनान्स कम्पनी लिमिटेडको सर्वाधिक कारोबार भएको छ । कम्पनीको २२ करोड ७७ लाख ४० हजार रूपैयाँ बराबरको कारोबार भएको हो ।
आज १ वटा कम्पनीको सेयरमूल्यमा सकारात्मक सर्किट लागेको छ । मध्य भोटेकोशी जलविद्युत कम्पनी लिमिटेडको सेयरमूल्यमा सकारात्मक सर्किट लागेको हो । यस्तै युनियन हाइड्रोपावरको सेयरमूल्य पनि ९.९९ प्रतिशत र कर्पोरेठ डेभलपमेन्ट बैंकको सेयरमूल्य ९.९८ प्रतिशतले बढेको छ ।
यस दिन प्रभु सेलेक्ट फण्ड को मूल्य सबैभन्दा धेरै घटेको छ । उक्त फण्डको मूल्य ३.१७ प्रतिशतले घटेर एक हजार ९.१७ रूपैयाँमा झरेको छ ।
